Privacy policy

PERSÓNUVERNDARSTEFNA LAUGA EHF. (World Class Ísland)

Með persónuverndarstefnu þessari er skýrt hvernig Laugar ehf. kt. 631098-2079, Sundlaugavegi 30a, 105 Reykjavík, fer með persónuupplýsingar meðlima sinna og viðskiptavina.

Laugum er umhugað um örugga meðferð persónuupplýsinga

Við virðum rétt þinn til einkalífs og tryggjum að öll meðferð persónuupplýsinga sé ávallt í samræmi við ákvæði gildandi laga og reglugerða um persónuvernd og meðferð persónuupplýsinga.

Við tryggjum að persónuupplýsingar séu ekki afhentar óviðkomandi þriðju aðilum og sérhver miðlun persónuupplýsinga á sér aðeins stað með samþykki viðkomandi eða í samræmi við heimild í gildandi persónuverndarlöggjöf. Við virðum sjálfsákvörðunarrétt þinn varðandi alla meðferð persónuupplýsinga og í persónuverndarstefnu þessari er nánar lýst hvernig þú getur haft áhrif á það hvernig persónuupplýsingar þínar eru notaðar.

Persónuverndarstefna þessi inniheldur upplýsingar um hvernig Laugar meðhöndlar persónuupplýsingar um þig, s.s. um söfnun, varðveislu og öryggi þeirra.

Persónuupplýsingar eru sérhverjar persónugreindar eða persónugreinanlegar upplýsingar um hinn skráða, þ.e. upplýsingar sem beint eða óbeint má rekja til tiltekins einstaklings, látins eða lifandi. Persónuupplýsingar geta verið nafn, símanúmer, netfang, debet- eða kreditkortanúmer, ip-tala eða upplýsingar um vörukaup einstaklings.

Við söfnum eftirfarandi persónuupplýsingum um meðlimi:

• Nafn.
• Kennitala.
• Andlitsmynd.
• Augnmynd.
• Netfang.
• Heimilisfang.
• Símanúmer.
• Upplýsingum um líkamsræktarsamninga, námskeið, vörur og þjónustu sem keypt er í stöðvum Lauga.

Við söfnum persónuupplýsingum m.a. í eftirfarandi tilvikum:

• Þegar þú gerir samning um aðgang að stöðvum og þjónustu heilsuræktarstöðva Lauga.
• Þegar þú notar heimasíðuna okkar (worldclass.is) og þegar þú samþykkir að fá fréttir, tilboð og annað kynningarefni.
• Þegar þú stofnar aðgang á Mínum síðum Lauga.
• Þegar þú kaupir vörur eða þjónustu í stöðvum okkar eða á heimasíðunni.

Aðgangi að stöðvum Lauga er stýrt með augnskannakerfi. Til að virkja aðgang félaga að stöðvunum er tekin mynd af auga viðkomandi og það geymt í augnskannakerfinu ásamt andlitsmynd, hvort tveggja er eingöngu til notkunar við aðgangsstýringu og hluti af öryggiskerfi Lauga. Þessar upplýsingar eru eingöngu geymdar meðan félagi er með virkan aðgang að stöðvum Lauga.

Þá kunna einnig að safnast myndbandsupptökur af þér í öryggismyndavélakerfi Lauga. Tilgangur öryggismyndavélakerfis er einkum öryggis- og eignavarsla, til að gæta hagsmuna félagsins, viðskiptavina þess, starfsmanna eða annarra.

Laugar nota persónuupplýsingar þínar alla jafna í þeim tilgangi að vinna beiðnir eða viðskiptafærslur, veita þér fyrsta flokks þjónustu, upplýsa þig um þjónustu sem við teljum að þú hafir áhuga á og í tengslum við viðskiptareikning þinn hjá fyrirtækinu. Persónuupplýsingar kunna að vera notaðar í eftirfarandi tilgangi:

• Til að sinna beiðni þinni um aðildarsamninga eða endurnýjun samninga og við önnur framkvæmdarleg atriði í tengslum við samninga.
• Við framkvæmd viðskipta, s.s. í tengslum við reikninga, halda utan um kaup á þjónustu, vörum, aðgangsstýringu og bókhaldskerfi.
• Við innri stjórn, s.s. áætlanagerð, verkaskiptingu, stefnumörkun, gæðakerfi, eftirlit, endurskoðun.

1. Aðgangsupplýsingar. Upplýsingar um aðgang félaga að stöðvum eru skráðar í aðgangsstýringakerfi Lauga. Þessar upplýsingar eru ekki nýttar í neinum tilgangi öðrum en til öryggis og til að tryggja hagsmuni Lauga vegna aðgangs og notkunar á þjónustu Lauga.

Notkunarupplýsingar eru geymdar að hámarki í 6 mánuði og eru aðgengilegar félögum á heimasíðu félagsins í gegnum Mínar síður. Þessar upplýsingar eru ekki hagnýttar á neinn máta til markaðssetningar eða annarra samskipta.

Þessum upplýsingum er ekki miðlað til annarra aðila nema í þeim tilfellum sem tiltekið er í kafla um miðlun persónuupplýsinga.

Félagi getur hvenær sem er óskað eftir að notkunarsögu hans sé eytt. Félagi þarf að koma á skrifstofu Lauga og sýna persónuskilríki svo að aðgerðin sé framkvæmd.

2. Aðildarupplýsingar. Upplýsingar um samninga og námskeið eru geymdar að hámarki í 2 ár eftir að samningi/námskeiði lýkur. Þetta er eingöngu gert til að gera félögum kleift að fá endurgreiðslukvittanir og upplýsingar um eigin samninga og aðildir.

Þessar upplýsingar eru ekki nýttar af Laugum á neinn máta nema í þeim tilgangi að veita félögum sem besta þjónustu í þeirra þágu.

Við miðlum persónuupplýsingum í eftirfarandi tilvikum:

1. Stéttarfélög og fyrirtæki vegna sértækra samninga. Ef félagi hefur gert samning við stéttarfélag, vinnuveitanda eða aðra aðila sem fara fram á staðfestingu aðildar eða notkunar þá veita Laugar þeim aðilum upplýsingar samkvæmt samningi félaga við viðkomandi aðila.

Forsenda slíkrar miðlunar er samningur á milli viðkomandi aðila og félaga. Laugar veita engar upplýsingar nema samkvæmt því sem sá samningur heimilar.

2. Þjónustuaðilar og verktakar. Í sumum tilvikum munum við notast við þjónustuaðila og verktaka til að sinna þjónustu fyrir okkar hönd.

Ef slíkir þriðju aðilar þurfa að nota persónuupplýsingar þínar í tengslum við þessa þjónustu tryggjum við að þeir noti þær aðeins í þeim eina tilgangi og ekki í öðrum ósamrýmanlegum tilgangi. Þá tryggjum við einnig að þeir haldi trúnað um upplýsingarnar og/eða að upplýsingunum sé skilað til okkar þegar þeir hafa ekki lengur þörf á þeim.

Í öðrum tilvikum en að framan greinir kunna Laugar að nota persónuupplýsingar í samræmi við tilgang með söfnun þeirra, s.s. þegar slíkt reynist nauðsynlegt til að gæta hagsmuna þinna, til að uppfylla ákvæði laga eða fyrirmæli yfirvalda, til að grípa til varna vegna krafna sem settar hafa verið fram og til að gæta hagsmuna, verja eigur eða önnur réttindi Lauga, viðskiptavina okkar, meðlima, starfsmanna eða ef almannahagur krefst þess. Slík notkun persónuupplýsinga kann að eiga sér stað til að varna svikum eða við rannsókn á slíkum brotum.

Spjallið í horni vefsins er rekið af Elvo ehf., Tryggvagötu 11, 101 Reykjavík, sem vinnsluaðila fyrir okkar hönd samkvæmt vinnslusamningi. Það sem þú skrifar þar berst í þjónustuborð World Class. Gervigreind svarar samstundis út frá upplýsingum um þjónustu okkar; enginn starfsmaður fylgist með spjallinu í rauntíma. Þurfir þú svar frá manneskju er síminn og netfangið hér að neðan rétta leiðin.

Samtölin eru geymd dulkóðuð innan Evrópska efnahagssvæðisins (Frankfurt) og gervigreindarvinnslan fer sömuleiðis fram innan EES. Ekkert úr samtölunum er notað til að þjálfa gervigreindarlíkön. Elvo styðst við fáeina undirvinnsluaðila fyrir hýsingu, gagnagrunn og gervigreind; listinn yfir þá er í vinnslusamningi Elvo, og persónuverndarstefna Elvo lýsir vinnslunni nánar.

Samtölin eru geymd á meðan við notum þjónustuna og þeim er eytt hjá Elvo þegar samningi okkar við þá lýkur. Viljir þú láta eyða samtali fyrr sendir þú okkur línu á personuvernd@worldclass.is; beiðnin fer til okkar, ekki til Elvo.

Spjallið er hugsað fyrir almennar spurningar um kort, tíma, stöðvar og verð. Ekki senda kennitölu, kortanúmer eða heilsufarsupplýsingar í spjallið. Erindi sem varða þína eigin aðild afgreiðum við í afgreiðslu, í síma 553 0000 eða á worldclass@worldclass.is.

Til að samtalið haldist milli síðna geymir spjallið auðkenni þess í vafranum þínum, á léni Elvo, ekki sem vafraköku á worldclass.is. Það er nauðsynlegt fyrir þjónustuna sjálfa og því ekki hluti af samþykkisvalinu fyrir vafrakökur. Auðkennið hverfur þegar þú hreinsar vefgögn í vafranum.

Við veitum þér ákveðinn rétt til að ákveða hvernig við förum með persónuupplýsingar þínar. Þú getur upplýst okkur um þá ákvörðun þína með ýmsum hætti. Ákvörðun þín um að vilja ekki að persónuupplýsingar þínar séu notaðar mun ekki hafa áhrif á hagsmuni þína eða þjónustu hjá Laugum.

Við munum ekki senda þér markpóst eða sms-skilaboð nema þú hafir áður veitt samþykki fyrir að fá slíkar sendingar. Ef þú kýst að veita slíkt samþykki, afturkalla það eða uppfæra persónuupplýsingarnar þínar — eða ef þig vantar nánari upplýsingar um persónuverndarstefnu okkar — getur þú komið við í afgreiðslum okkar, haft samband í síma 553 0000 eða sent okkur tölvupóst á personuvernd@worldclass.is.

Vafrakökur eru litlar skrár sem vefurinn geymir í tækinu þínu. Aðeins nauðsynlegar kökur fara af stað sjálfkrafa. Allar aðrar bíða þangað til þú hefur valið, og þú getur skipt um skoðun hvenær sem er: opna stillingar vafrakaka. Vefurinn virkar jafn vel þótt þú hafnir.

Nauðsynlegar kökur halda utan um körfuna í vefversluninni, verja vefinn gegn misnotkun og geyma valið sem þú gerir hér. Kakan wc_consent geymir valið í 12 mánuði. Í henni er ekkert nema útgáfunúmer, hvað þú valdir og hvenær.

Netspjallið geymir auðkenni samtalsins í vafranum svo það haldist milli síðna. Það er hluti af þjónustunni sjálfri, ekki mæling, og er útskýrt í kaflanum Netspjall á vefnum.

Tölfræði byggir á Google Analytics, sem setur kökurnar _ga og _ga_* til allt að tveggja ára. Þær segja okkur hvaða síður eru skoðaðar, úr hvaða tæki og hvaðan fólk kemur inn á vefinn. Auk þess notum við Microsoft Clarity, sem setur kökurnar _clck í eitt ár og _clsk í einn sólarhring. Clarity skráir hvernig síðurnar eru notaðar, það er smelli, skrun og hreyfingar, og býr til úr því nafnlausar upptökur og hitakort. Það sem þú skrifar í reiti er hulið og berst ekki til Clarity. Við notum þetta til að finna hvar fólk lendir í vandræðum á vefnum og laga það. Ekkert af þessu hleðst fyrr en þú samþykkir.

Markaðssetning byggir á Meta, sem setur kökurnar _fbp og _fbc í 90 daga, Google (auglýsingar gegnum Google Tag Manager), sem setur meðal annars _gcl_au í 90 daga, og Klaviyo, sem setur __kla_id. Þetta mælir hvort auglýsingarnar okkar skila sér og gerir okkur kleift að sýna þér World Class á öðrum vefjum og samfélagsmiðlum. Hluti mælinganna fer fram á vefþjóni okkar og stöðvast sömuleiðis ef þú hefur ekki samþykkt. Ekkert af þessu hleðst fyrr en þú samþykkir.

Mælingar án vafrakaka. Við teljum heimsóknir og mælum hve hratt síðurnar hlaðast með Vercel Analytics og Vercel Speed Insights, sem geyma ekkert í tækinu þínu. Í stað þess að þekkja þig aftur býr þjónustan til dulkóðað auðkenni úr beiðninni og eyðir því eftir sólarhring. Þetta krefst ekki samþykkis og er ekki hægt að slökkva á.

Google, Microsoft, Meta og Klaviyo bera sjálf ábyrgð á þeim gögnum sem þau taka við, og vinnslan getur farið fram utan Evrópska efnahagssvæðisins á grundvelli gildandi flutningsheimilda. Persónuverndarstefnur þeirra útskýra það nánar.

Þú getur líka stillt vafrann þinn þannig að hann hafni kökum eða láti þig vita af þeim. Það hefur sömu áhrif og að hafna hér, en gildir þá um alla vefi sem þú heimsækir.

Bætum við nýjum þjónustuaðila eða nýjum tilgangi biðjum við þig að velja upp á nýtt. Gamalt samþykki nær ekki yfir nýja vinnslu.

worldclass.is notast við SSL-skilríki sem þýðir að öll samskipti eru dulkóðuð og það gerir gagnaflutning í gegnum vefinn öruggari.

SSL-skilríki varna því að óprúttnir aðilar komist yfir gögn sem send eru í gegnum vefinn, eins og t.d. lykilorð og persónuupplýsingar. Með skilríkjunum eru upplýsingar sem sendar eru milli notenda dulkóðaðar og gögnin sem flutt eru á milli skila sér á réttan stað á öruggan máta.

Vefurinn er hýstur hjá Vercel. Vefþjónarnir sem afgreiða beiðnir þínar, þar á meðal skráningar og pantanir, keyra í gagnaveri í Dublin á Írlandi, innan Evrópska efnahagssvæðisins. Opinbert efni vefsins er að auki geymt í skyndiminni á dreifineti Vercel víða um heim svo síðurnar hlaðist hratt; þar eru engar persónuupplýsingar. Vercel er með ISO 27001 og SOC 2 öryggisvottun og vinnslusamningur er í gildi milli okkar.

Þegar þú verslar á vefversluninni okkar munum við safna upplýsingum um kennitölu, nafn, heimilisfang, bæjarfélag, póstnúmer, netfang og síma. Þessar upplýsingar eru einungis notaðar til að hægt sé að klára pöntunina.

Þegar þú pantar vöru í vefversluninni eru upplýsingar um kreditkortið þitt aðeins vistaðar á meðan viðskiptin fara fram. Kortafyrirtækin geyma kortaupplýsingar þínar í öruggum kerfum sínum, en ekki á greiðslusíðunni sjálfri.

Um leið og pöntunin er staðfest og þú færð staðfestinguna í hendur verður öllum upplýsingum um kortið þitt eytt úr kerfinu. Kortaupplýsingar þínar eru öruggar á meðan ferlinu stendur.

Fyrir frekari upplýsingar um öryggi greiðslu þinnar vísum við á heimasíðu kortafyrirtækisins.

Við áskiljum okkur rétt til að breyta þessari persónuverndarstefnu hvenær sem er en við munum upplýsa þig um slíkar breytingar með því að vísa til dagsetningar breytinganna efst á síðunni. Við hvetjum þig til að fara ítarlega yfir persónuverndarstefnu okkar þannig að þér sé ljóst hvernig persónuupplýsingar þínar eru notaðar. Verði gerðar efnislegar breytingar á persónuverndarstefnu þessari sem breyta því hvernig við notum persónuupplýsingar — og slíkar breytingar fara ekki saman við þann tilgang sem lýst er í persónuverndarstefnunni — munum við upplýsa um slíkar breytingar með góðum fyrirvara áður en þær taka gildi.

Ef þú hefur spurningar í tengslum við þessa persónuverndarstefnu eða þarfnast annarrar aðstoðar þá getur þú komið við í afgreiðslum okkar, haft samband í síma 553 0000 eða sent okkur tölvupóst á personuvernd@worldclass.is.