Hreyfing sem streituvörn

3.12.2011

Hvernig stendur á því að þegar streitutímabil verða í lífi fólks, t.d. í formi próftarna og undirbúnings hátíðahalda eins og jóla að þá dragi fólk stórlega úr markvissri hreyfingu?  Einmitt á þeim tíma þar sem það þyrfti svo á því að halda líkamlega jafnt og  andlega.  Við þurfum ekki rannsóknir til að segja okkur að okkur líður enn betur og komum jafnvel enn meiru í verk ef við hreyfum okkur ásamt því að það styrkir ónæmiskerfi okkar og veitir okkur útrás og jafnvel innblástur vegna ýmissa tilfinninga.  En hreyfing  og stjórnun streitu eru afskaplega tengd fyrirbæri þar sem hreyfing getur verið mjög áhrifamikil sem streitulosun t.d. vegna eftirtalinna atriða:

Útrás fyrir gremju og pirring

Þegar gremja og pirringur hleðst upp þá getur orkumikil hreyfing eins og t.d. hnefaleikar, hlaup  eða lóðalyftingar stuðlað að áhrifamikilli losun á þessum neikvæðu tilfinningum,  með því að umbreyta þessum annars óheilsuvænu tilfinningum yfir í hvetjandi orku fyrir aukna heilsu og vellíðan.

Hreyfing og streituhormón

Hreyfing getur þannig minnkað streituhormón eins og t.d. kortisol og aukið hormón eins og endorfín sem er „vellíðunarhormón“ líkamans og hver vill ekki fá sitt eigið löglega „rush“ með því að hreyfa sig almennilega?

Hugsa um eitthvað annað

Líkamleg hreyfing getur fengið þig til að hugsa um eitthvað annað og veitt þér þar með hvíld frá daglegu amstri og eins aukið og skerpt einbeitingu á mikilvægum málum t.d. í vinnunni já eða í próflestri.    

Líta vel út

Já já hver hefur ekki leitt hugann að því að með því að hreyfa sig markvisst leiði til þess að þú lítir betur út –  passir t.d. betur í uppáhaldsbuxurnar o.s.frv.  Yfirborðslegt – kannski?  En jákvæðu áhrif hreyfingar eru einmitt þyngdartap, vöðvatónun og að viðhalda heilbrigðri andlegri og líkamlegri vellíðan.

Félagslegur stuðningur

Það að hreyfa sig með félaga veitir mörgum góðan stuðning ásamt heilmikilli hvatningu og þar með færð þú jafnframt tvöfaldan skammt af streitulosun í formi hreyfingar og félagsskapar.

Aukið heilbrigði

Þar sem streita getur verið orsakavaldur að ýmsum sjúkdómum, þá geta sjúkdómar einnig valdið streitu, með líkamlegum verkjum og ýmisskonar skerðingu á lífsgæðum eins og t.d. að geta ekki tekið þátt í félagslegum athöfnum og verða þar með einangraður frá hinu daglega lífi. Þannig að með því að bæta enn betur heilsu þína og úthald með hreyfingu geturðu þannig jafnvel fyrirbyggt streitu með því að styrkja ónæmiskerfið gegn kvefi, flensu og öðrum minniháttar kvillum.  Ásamt því að til lengri tíma litið stuðlað að enn betri lífsgæðum í formi betri heilsu.

Viðnám gegn streitu

Ýmsar rannsóknir benda til þess að líkamleg hreyfing veiti okkur mannfólkinu betra viðnám gegn streitu og við séum þar með betur í stakk búinn til að takast á við streitukenndar aðstæður.   Ef þetta er ekki einstaklega góð ástæða til að koma sér af stað þá veit ég ekki hvað annað gæti gert það?

Í stuttu máli sagt þegar kemur að tímabilum í lífi okkar eins og nú er að fara í hönd, prófatími og aðventan þá skiptir öllu máli að skipuleggja sig – taka einn dag í einu og halda áfram að hreyfa sig.  Sleppum því í ár að setja heilsuna á frest þar til í janúar og byrjum strax í dag!  Því þar komum við klárlega að kjarna málsins – heilsan tekur ekkert frí á meðan við erum á kafi í jólaundirbúningi.  Hver hefur ekki hálfa til eina klukkustund á dag til að rækta kroppinn sinn – hljómar klisjulega en heilsan er það dýrmætasta sem við eigum.  Komasssooo  it´s gó time á að hreyfa þennan kropp!

Ásthildur Björnsdóttir
Hjúkrunarfræðingur, ÍAK einkaþjálfari og Tabata kennari

• Tweet